កម្មវិធីនាទីឈ្វេងយល់ព្រះពុទ្ធសាសនា លើកទី ៣៩៩ ប្រារឰនៅថ្ងៃ ១០ កើត ខែជេស្ឋ ពុទ្ធសករាជ ២៥៥៤ ត្រូវនឹងថ្ងៃទី ២៣ ខែ ឧសភា ឆ្នាំ ២០១០ក្រោម អធិបតីរបស់ លោកជំទាវ ម៉ែននារីវុឌ្ឍី ហូសុទ្ធី និង ឧកញ៉ា មហាឧបាសិកា ញ៉ឹក ប៊ុនថា ជាអ្នកឧបត្ថម្ភកម្មវិធី ដោយមានព្រះសង្ឃចូលរួមមានចំនួន ២៨ អង្គ និង ពុទ្ធបរិស័ទ្ធ មានចំនួនប្រមាណជា ២០០ នាក់។​

កម្មវិធីនោះមានប្រធានបទអំពី បុគ្គល ៤ ពួក ម្នាលអាវុសោ ទាំងឡាយ បុគ្គលពួកខ្លះ ក្នុងលោកនេះ ជាអ្នកធ្វើខ្លួនឱ្យក្តៅ ប្រកបព្យាយាម ដើម្បីធ្វើខ្លួនឱ្យក្តៅ១។ ម្នាលអាវុសោ ទាំងឡាយ បុគ្គលពួកខ្លះក្នុងលោកនេះ ជាអ្នកធ្វើបុគ្គលដទៃឱ្យក្តៅ ប្រកបព្យាយាមដើម្បី ធ្វើបុគ្គលដទៃឱ្យក្តៅ១។ ម្នាលអាវុសោទាំងឡាយ បុគ្គលពួកខ្លះក្នុងលោកនេះ ជាអ្នក ធ្វើខ្លួនឱ្យក្តៅ ប្រកបព្យាយាម ដើម្បីធ្វើខ្លួនឱ្យក្តៅផង ធ្វើបុគ្គលដទៃឱ្យក្តៅ ប្រកបព្យាយាម ដើម្បីធ្វើបុគ្គលដទៃឱ្យក្តៅផង ១។ ម្នាលអាវុសោទាំងឡាយ បុគ្គលពួកខ្លះក្នុងលោកនេះ មិនធ្វើខ្លួនឱ្យក្តៅ មិនប្រកបព្យាយាម ដើម្បីធ្វើខ្លួនឱ្យក្តៅ មិនធ្វើបុគ្គលដទៃឱ្យក្តៅ មិនប្រកប ព្យាយាម ដើម្បីធ្វើបុគ្គលដទៃឱ្យក្តៅ បុគ្គលនោះឈ្មោះថា មិនធ្វើខ្លួនឱ្យក្តៅ មិនធ្វើបុគ្គល ដទៃឱ្យក្តៅ ជាអ្នកលែងមាន សេចក្តីស្រេកឃ្លាន មានទុក្ខរលត់ហើយ មានសេចក្តីត្រជាក់ កើត ហើយ ទទួលនូវសេចក្តីសុខ មានខ្លួនដូចជា ព្រហ្មនៅក្នុងបច្ចុប្បន្ននេះ១។

នៅក្នុងថ្ងៃនេះក៏មានកម្មវិធីវេរ ព្រះត្រៃបិដក ១ចប់ ព្រមទាំងទូ១ វចនានុក្រម បទានុក្រម រត្តនវត្ថុ ពុទ្ធបរិស័ទ ១ចប់់ ប្រគេនដល់ព្រះសង្ឃគង់នៅៈ សាលាឆទាន ភូមិដូនឡី ឃុំគរ ស្រុកព្រៃឈរ ខេត្តកំពង់ចាម។